สุปฏิปนฺนสฺสาปิ ธมฺมาภิสมโย น โหติ ฯ ยถา วา ปน มหาราช อพลทุพฺพล-
ปริตฺตกอปฺปกโถกมนฺทคฺคิ อุปหตปฺปภํ ภเวยฺย อปิ นุ โข มหาราช ตาวตฺตเกน มนฺเทน
อคฺคินา สกฺกา สเทวเก โลเก อนฺธการํ วิธมิตฺวา อาโลกํ ทสฺเสตุนฺติ ฯ น หิ
ภนฺเตติ ฯ เกน การเณน มหาราชาติ ฯ มนฺทตฺตา ภนฺเต อคฺคิสฺส โลกสฺส มหนฺตตฺตา
อนฺธการสฺส มหนฺตตฺตาติ ฯ เอวเมว โข มหาราช อูนกสตฺตวสฺสิกสฺส จิตฺตํ อพลํ ทุพฺพลํ
ปริตฺตกํ อปฺปํ โถกํ มนฺทํ อวิภูตํ มหตา จ อวิชฺชนฺธกาเรน ปิหิตํ ตสฺม่ ทุกฺกรํ
ญาณาโลกํ ทสฺสยิตุํ เตน การเณน อูนกสตฺตวสฺสิกสฺส สุปฏิปนฺนสฺสาปิ ธมฺมาภิสมโย
น โหติ ฯ ยถา วา ปน มหาราช กีสา อนุปริมิตกายา สาลิกกิมิ หตฺถินาคํ ติธาปฺปภนฺนํ
นวายตํ ติวิตฺถตํ ทสปรินาหํ อฏฺฐรตนิกํ ฐานมุปคตํ ทิสฺวา คิลิตุํ ปริกฑฺเฒยฺย อปิ
นุ โข มหาราช สาลิกกิมิ สกฺกุเณยฺย ตํ หตฺถินาคํ คิลิตุนฺติ ฯ น หิ ภนฺเตติ ฯ
เกน การเณนาติ ฯ ปริตฺตตฺตา ภนฺเต สาลิกกิมิยา สรีรสฺส มหนฺตตฺตา
หตฺถินาคสฺสาติ ฯ เอวเมว โข มหาราช อูนกสตฺตวสฺสิกสฺส จิตฺตํ อพลํ ทุพฺพลํ ปริตฺตํ
อปฺปํ โถกํ มนฺทํ อวิภูตํ มหตี อสํชตา นิพฺพานธาตุ โส เตน ทุพฺพเลน จิตฺเตน
ปริตฺเตน มนฺเทน อวิภูเตน น สกฺโกติ มหนฺตํ อสํชตํ นิพฺพานธาตุํ ปฏิวิชฺฌิตุํ เตน
การเณน อูนกสตฺตวสฺสิกสฺส สุปฏิปนฺนสฺสาปิ ธมฺมาภิสมโย น โหตีติ ฯ สาธุ ภนฺเต
นาคเสน เอวเมตํ ตถา สมฺปฏิจฺฉามีติ ฯ

เอกจฺจาเนกจฺจานํ ธมฺมาภิสมยปญฺโห ตติโย ฯ

ภนฺเต นาคเสน กึ เอกนฺตสุขํ นิพฺพานํ อุทาหุ ทุกฺเขน มิสฺสกนฺติ ฯ เอกนฺตสุขํ
มหาราช นิพฺพานํ ทุกฺเขน อมิสฺสกนฺติ ฯ น มยํ ตํ ภนฺเต นาคเสน วจนํ
สทฺทหาม เอกนฺตสุขํ นิพฺพานนฺติ ฯ เอวเมตฺถ มยํ ภนฺเต นาคเสน ปจฺเจม นิพฺพานํ
ทุกฺเขน มิสฺสกนฺติ การณญฺเจตฺถ อุปลภาม นิพฺพานํ ทุกฺเขน มิสฺสกนฺติ ฯ กตเมตฺถ
การณํ ฯ เย เต ภนฺเต นาคเสน นิพฺพานํ ปริเยสนฺติ เตสํ ทุสฺสติ กายสฺส จ
จิตฺตสฺส จ อาตาโป ปริตาโป ฐานจงฺกมนนิสชฺชาสยนอาหารปริคฺคโห มิทฺธสฺส จ อุปโรโธ
อายตนานญฺจ ปฏิปีฬนํ ธนธญฺญปิยญาติมุตฺตปชหนํ ฯ เย เกจิ เลเก สุขิตา สุขสมปฺปิตา
สพฺเพ เต ปญฺจกามคุเณหิ อายตเน รเมนฺติ พฺรูเหนฺติ มนาปิกํ พหุวิธํ สุภนิมิตฺตํ รูปํ
ทสฺสเนน จกฺขุํ รเมนฺติ พฺรูเหนฺติ มนาปิกคีตวาทิตพหุวิธสุภนิมิตฺเตน สทฺทน โสตํ รเมนฺติ
พฺรูเหนฺติ มนาปิกปุปฺผปตฺตผลตจมูลสารพหุวิธสุภนิมิตฺเตน คนฺเธน ฆานํ รเมนฺติ พฺรูเหนฺติ